Zer da Udal aurrekontua? Herriko beharrizanak asetzeko baliabideak kudeatzeko tresna.
Herritarrak erdigunean jarriko dituen udal jardun eredua sendotzeko asmoz, Hondarribiako Udalak 2026ko aurrekontu parte-hartzaileen prozesua jarri du martxan. Aurrekontu parte-hartzaileak lehenago ere egin badira ere, formatu honetan egingo den lehen aldia izango da.
Zer egingo da? Udalaren aurrekontuaren zati bat herritarren erabakiaren esku uztea. Datorren urterako proiektuak sortu eta bozkatuko dira. 200.000€ko aurrekontu partida gorde dira proiektu horiek egikaritzeko.
Ekimen honen helburua da herritarren eta udalaren arteko harremana sendotzea, gardentasuna indartzea eta hondarribiarren beharrak erabaki publikoen erdigunean jartzea. Aurrekontu parte-hartzaileen bidez, hondarribiarrek euren iritzia eta lehentasunak modu eraginkorrean islatu ahal izango dituzte udal politiketan.
Prozesu hau aurrera eramateko Udalak udal talde guztien arteko elkarlana lehenetsi du, eta ekimenak alderdi politiko guztien babesa jaso du. Partaidetzazko aurrekontuen arrakasta herritarren inplikazioan ez ezik, udal ordezkaritza osoaren konpromisoan ere oinarritzen da. Elkarlanaren bidez, gardentasunean eta konfiantzan oinarritutako gobernantza eredua sendotzea da helburua.
