Hiri mugikortasun iraunkorraren ordenantza

Zazpigarren titulua. Salgaien banaketa eta ibiak

I. KAPITULUA. SALGAIEN BANAKETA

63. artikulua. Salgaien zamalanak eta ordutegiak

1. Salgaien zamalanak, lehentasunez, haien jatorri edo helburu diren merkataritzako, industriako edo bestelako lokalen barruan egingo dira. Halakorik ezean, zamalanak horretarako erreserbatutako eremu eta ordutegietan egingo dira.
2. Udalak zamalanetarako eremuak eta horien ordutegia mugatu eta seinaleztatuko ditu, kontuan hartuta bide edo espazio publikoaren mota, merkataritza- edo industria-beharrak, lan horiek mugikortasunean eta hiri- ingurumenean duten eragina eta, oro har, ordenantza honen oinarri diren printzipioak.
3. Zamalanetarako ordutegia alkateak edo horrek eskuordetzen duen zinegotziak zehaztuko du, eta ordutegi bereiziak ezarri ahal izango ditu ibilgailu mota bakoitzarentzat, ibilgailuaren dimentsioen eta haren emisio kutsatzaile handiagoen edo txikiagoen arabera.
4. Sendagaiak oinezkoen eremuetan kokatutako farmazia-bulegoetan edo osasun-zentroetan entregatzeko ibilgailuek baimena lortu ahal izango dute haiek beste ordu-tarte batzuetan banatzeko.
5. Eremu berriak zehazteko edo daudenak aldatzeko, baita ordutegiak zehazteko ere, kontuan hartuko dira inguruneko beharrak eta dagozkion aurretiazko azterlan teknikoak.

64. artikulua. Salgaien zamalanak egitea

Zamalanak honako arau hauen arabera egingo dira:

• Zamalanak arreta handienaz egingo dira, aldameneko eraikinen okupatzaile eta bide publikoaren erabiltzaileenganako zaratak edo eragozpenak saihestuko dira, eta erabilitako eremua garbi utzi beharko da.
• Oinezkoen eremuak edo bizikleta-bideak zeharkatu behar direnean, oinezkoen eta bizikleten erabiltzaileen lehentasuna errespetatu beharko da, hurrenez hurren.
• Ezin izango da salgaiak edo beste objektu batzuk jasotzeko edo jaisteko jarduerarik egin polea, garabi edo bestelako makinen bidez, pertsonen segurtasuna edo ondasunen osotasuna arriskuan jartzen badute.

65. artikulua. Salgaien zamalanetara zuzendutako ibilgailuak

1. Hirigunean salgaiak banatzera zuzendutako ibilgailuak, ahal dela, elektrikoak edo gutxi kutsatzen dutenak izango dira. Manu honen ondorioetarako, alkateak edo horrek eskuordetzen duen zinegotziak mugatuko ditu hirigunea osatzen duten kaleak, dagozkion seinaleen bidez.
2. Turismo-ibilgailu partikularrek ezin izango dituzte zamalanetarako eremuak erabili. Hala ere, beren ibilgailu partikularrekin unean uneko zamalanak egin beharra duten saltoki txikien titularrek edo langileek zamalanetarako erreserbatutako espazioak erabili ahal izango dituzte, denbora-muga berarekin.

66. artikulua. Salgaien hiri-banaketarako zentroa salgaien

Salgaien banaketa hobeto antolatzeko, Mugikortasun Jasangarriaren Planean aurreikusitakoarekin bat etorriz, Udalak hiri-banaketarako zentro bat sortu ahal izango du. Zentro horrek aukera emango du distantzia laburrean salgaien banaketa kapilarra egiteko eta salgaiak merkatarien eta bezeroen beharren arabera biltegiratzeko.

II. KAPITULUA. IBIAK

67. artikulua. Ibi-lizentzia eta ibiaren erabilera

1. Ibilgailuak bide publikotik eraikin batera sartzeko edo handik irteteko jabari publikoaren zati bat erabilgarri izateko, aldez aurretik Udalaren baimena beharko da, ibi-lizentzia izenekoa.
2. Ibi-lizentziak emateko prozedura ordenantza honen IV. eranskinean ezarritakoaren arabera tramitatuko da.
3. Ibi-lizentziek, indarrean dauden bitartean, baimena eman ahal izango dute jabari publikoa iraunkorki edo ordutegi mugatuan erabiltzeko. Azken kasu horretan, asteko egun jakin batzuetan eta/edo eguneko ordu jakin batzuetan baino ez dute pasatzea baimenduko.
4. Ibi-erreserba gisa seinaleztatutako espazioa ibilgailuen sarrera eta irteerara soilik dago zuzenduta. Espazio horretan ezin izango du inolako ibilgailurik aparkatu.

68. artikulua. Ibia seinaleztatzea

1. Ibiek bertikalki eta, hala badagokio, horizontalki seinaleztatuta egon beharko dute IV. eranskinean aurreikusitakoaren arabera.
2. Seinaleak bat etorriko dira trafikoari eta bide-segurtasunari buruzko araudian aurreikusitako eredu ofizialarekin, eta Udalak entregatuko ditu dagokion tasa ordaindu ondoren.
3. Ibi-lizentziaren titularrak sarrera behar bezala seinaleztatuta eta seinaleak kontserbazio-egoera egokian eduki beharko ditu. Seinaleak hondatu edo lapurtuz gero, kopia bat eskatu beharko dio Udalari.
4. Ibi-lizentziaren titularrari egokituko zaizkio ibia seinaleztatzeak eragindako gastuak, bide publikoan hura gaitzeko beharrezkoak diren obrak eta jabari publikoaren erabilera bereziaren ondorioz espaloietan eragindako kalteak.

69. artikulua. Ibi-lizentzia aldi baterako etetea

Pasabide-lizentziaren indarraldia aldi baterako eten ahal izango da mugikortasuna antolatzeko, bide publikoan obra publikoak egiteko, bide publikoen beste erabilera batzuetarako edo behar bezala arrazoitutako interes orokorreko beste edozein arrazoirengatik.