Autoak gelditzea eta aparkatzea
Hiri inguruneei aplikatu beharreko trafikoko eta bide segurtasuneko araudian ezarritako moduan egingo dira autoen geldialdiak, eta debekatua dute honako kasu hauetan gelditzea:
Seinaleek edo Udaltzaingoak berariaz debekatzen duen lekuetan.
Bigarren ilaran.
Behar bezala gelditua edo aparkatua dagoen beste ibilgailu bat zirkulatzen hastea galarazten denean.
Higiezinetarako sarbidea edo irteera eragozten edo zailtzen denean.
Seinalatutako larrialdietako ibilgailuentzako irteeretan eta sarbideetan.
Oinezkoen edo txirrindularien joan-etorria oztopatzen den lekuetan.
Beste ibilgailu batzuei bira baimendua egitea eragozten zaienean.
Galtzadaren erdian, berariazko baimenik izan ezean.
Beste espaloian gelditutako beste ibilgailu baten parean, baldin eta horrek bidetik ibiltzea eragozten badu.
Bizikletentzat gordetako aparkalekuak erabiltzea galarazten edo oztopatzen denean.
Ibilgailua geratzeak oinezkoen joan-etorrietarako edo beste ibilgailu batzuen zirkulaziorako arrisku edo oztopo larria eragin dezakeen egoeretan.
Geldialdiak egiteko bezalaxe, hiri inguruneetan aplikatu beharreko trafikoari eta bide segurtasunari buruzko araudian aurreikusitako arauak bete behar dira autoak aparkatzeko.
Autoak horretarako bereziki prestatutako guneetan bakarrik aparka daitezke, doako nahiz ordainpeko aparkalekuak izan.
Aparkatzeko tokia mugatua dagoenean zoladuran, marken artean aparkatu beharko duzu, beste erabiltzaileak oztopatu gabe.
Zirkulazio errei baten ondoan aparkatzen duzunean, aparkalekua mugatzen duen marra gainditu gabe egin behar duzu.
Espazio publikoaren erabilera komunak ez du babesten autoak leku berean mugarik gabe aparkatzea; beraz, ezarritako denbora mugak errespetatu behar dituzu.
Horren harira, autoak ezin dira leku berean aparkatu hamar egun baliodun baino gehiagoz jarraian, eta aparkaleku arautuetan eta ordainpeko aparkalekuetan, berariaz ezarritako denboran aparkatu ahal izango dira.
Era berean, ezin da autorik eremu publikoan aparkatu produktuak saltzeko, alokatzeko edo beste edozein negozio egiteko, ezta publizitate kontuengatik ere.
