Osakidetzak Eskualdeko larrialdi pediatrikoen zerbitzuan erabakitakoaren aurrean, Cristina Laborda eta Igor Enparan Irungo eta Hondarribiko alkateek, hurrenez hurren, Jaurlaritzako Osasun sailarekin batera kontsentsuaren alde lan egin behar dela diote, eskualdeko familien interesekin bat datorren konponbide bat emateko.

Joan den ostegunean, Irungo alkateak informazioa eskatu zion Bidasoa ESIko zuzendariari, eta, horren ondoren, egun bat geroago, Osakidetzako zuzendari nagusiak informazio-bilera batera deitu zituen bi alkateak. Bilera horretan izan ziren, halaber, Bidasoa ESIko eta Bidasoko Eskualde Ospitaleko lehen mailako arretako Pediatria arloko arduradun nagusiak.

Laborda zein Enparan aurrez aurre jaso zuten egoera berriaren informazioa, eta eskatu zuten eskualdeko osasun-arretaren ereduan gertatzen den edozein neurri edo aldaketa Bidasoa ESIko Gizarte Kontseiluan adostuta egin dadila beti, organo horretan baitaude ordezkatuta eskualdeko eragile soziosanitario nagusiak.

Agintari gorenek Alberto Martinez Osasun sailburuarekin bilera bat egitea eskatu dute, Bidasoko herritarren benetako beharrak kontuan hartuko dituen adostasun zabal bat lortze aldera.

Bi alkateek adierazi dute seme-alabak dituzten familien artean sentsibilitate sozial handia pizten duela gaiak, eta, horregatik, prest agertu dira Eusko Jaurlaritzarekin batera lankidetzan aritzeko, pediatriako larrialdien arloko egungo eredua aldatuko ez duen akordio bat lortze aldera.