Larunbat gauean, eraso homofobo bat izan zen Hondarribian. Pertsona batek sexu-orientazioarekiko umiliazioak eta mespretxua jasan zituen, eta beste pertsona batek fisikoki eraso zion.

Hondarribiko Udalak gogor gaitzetsi nahi du gertaera, eta gertutasuna eta elkartasuna adierazi nahi dio erasoa jasan duen pertsonari.

Eraso homofobo horrek Hondarribiko errespetuzko bizikidetza hautsi du, eta, horregatik, Hondarribiko Udalak nabarmendu nahi du antzeko ekintza guztiak, giza eskubideen urraketak diren aldetik, lekuz kanpo daudela, pertsona guztiok baitugu duintasunez bizitzeko eskubidea.

Hondarribiko Udalak urteak daramatza LGTBIQA kolektiboarekin batera lanean. Kolektibo horrek konpromisoa du berdintasuna eta sexu-aniztasunarekiko errespetua bilatzeko, bai eta pertsonak sexu-orientazioagatik edo genero identitateagatik ez diskriminatzeko ere.

Esparru horretan egindako aurrerapenak aitortzen ditugu, baina asteburu honetan pertsona batek jasan dituen erasoek gaur egun oraindik ere dauden oztopoak eta oraindik egiteko dagoen lana erakusten dituzte. Aniztasun sexualaren eta pertsonak beren orientazio sexualagatik edo genero-identitateagatik ez baztertzearen aldeko politiketan inbertitzeko beharra dagoela egiaztatzen dugu, arreta, informazio, prestakuntza, sentsibilizazio eta kontzientziazioko programak eta proiektuak garatuz, gure herriak aniztasun sexualerako gune seguruak izan daitezen adierazpen guztietan. Eta horiek gauzatzeko konpromisoa adierazten dugu, sexu-askatasunen alde lan egiten duten kolektibo eta elkarteak babestuz eta herritar guztiak sentsibilizatzeko eta kontzientziatzeko kanpainak bultzatuz.

Era berean, Hondarribiko herritarrei dei egiten diegu eraso honen aurka agertzeko, Udalak bihar, urtarrilak 31, asteartea, arratsaldeko 7etan Martxoak 8 plazan deitutako elkarretaratzera joanda.

EAJ     ABOTSANITZ      PSE-EE      EH BILDU