Hondarribiko Gaztelekuaren Udal Zerbitzuak neguko programazio berezia aurkeztu du: Neguko Oporrak. Abendu honetan jarduera-egun eta plaza kopuru handiagoarekin iritsiko da, baita kanpoko jardueren eskaintza zabalduarekin ere. Horrez gain, zerbitzuak Elkarbizi programaren urteko arreta pertsonalizatua aktibatuko du.

Neguko oporrak: eskaintza zabalagoa eta gozatzeko aukera gehiago

Gaztelekuaren Neguko Oporrak kanpaina abenduaren 1ean abiatuko da berrikuntza esanguratsuekin. Besteak beste, ia jarduera guztietan plaza gehiago izango dira. Gaztelekuak baliabide ekonomiko eta giza baliabide handiagoak izango ditu 2025-2026 ikasturterako, eta horri esker handitu dira programazioaren dimentsioa eta plazen eskaintza.

Neguko Oporrak abenduaren 22tik urtarrilaren 3ra izango da: zortzi jardunaldi berezi, iazko eskaintzari hiru egun gehiago gehituta. Ekintza guztiak doakoak izango dira, nahiz eta gehienetan aurrez izena eman beharko den. Aurreikusitako jardueren artean honakoak nabarmendu daitezke:

Kanpo-jarduera gidatuak (48 plaza bakoitzean)

• Salting Iruñara irteera
• Irristaketa goiza, Txuri Urdinen
• Eurekara! Zientzia Museora bisita

Joan-etorrirako garraioa (Gaztelekutik) eta jardueretarako sarrera, barne.

Gaikako tailerrak

• Bitxigintza tailerra (20 plaza)
• Mastertxof (30 plaza)

Jai-jarduerak

• Urte Zahar Faltsua
• Gabonetako Zinemaldia

Izen-emateak abenduaren 1etik 14ra egin ahal izango dira, Gazteen Zerbitzuan (Jabier Ugarte, 6) edo Udalaren webgunean.

ELKARBIZI, gazteria anitzago eta integratzaileago baterantz

Neguko Oporrak egitarauarekin batera, Gaztelekuak gazteen inklusioaren aldeko apustua sendotu du ELKARBIZI programarekin. Programa urrian jarri zen martxan, eta arreta pertsonalizatura bideratutako zerbitzu berria du ezaugarri nagusi.

ELKARBIZI dinamika integratzailea da, eta bertan, jasangarritasuna, kultura-aniztasuna edo integrazioa bezalako gizarte-balioetan oinarritutako jarduerak lantzen dira. Tailer eta dinamika irisgarrien bidez — zeinu-hizkuntza, jolas tradizionalak edo naturara joateko irteerak —, gazte guztientzako parte-hartze baldintza berdinak bermatzea du helburu.

Programaren bereizgarri nagusia arreta pertsonalizatuaren zerbitzua da: hezitzaile bat (finkoa, langileen plantillan integratua) arduratuko da laguntza berezia behar duten gazteen integrazio-prozesua gidatzeaz, oztopo fisiko edo funtzionalen ondorioz sozializaziorako zailtasunak dituztenean. Betekizun garrantzitsuenetako bat da jarduerek izaera kolektiboa izatea, taldean eginez parte-hartzaile guztien egokitzapena eta inklusioa errazteko.

ELKARBIZI asteazkenetan garatzen da, parte-hartzaile talde egonkor bat du eta ikasturte honetan proiektu pilotu gisa jardungo du. Azken ebaluazioak hurrengo ikasturterako egokitzapenak egiteko aukera halbidetuko du. ELKARBIZIn parte hartzea zabalik dago gaztelekuko erabiltzaile guztientzat, eta interesa dutenek Gaztelekuan bertan (Molla 1) eman dezakete izena.

Arreta pertsonalizatuko zerbitzua eskatzeko, Gazteria Sailak atal berezi jarri du martxan udalaren APPan. Bertan datuak bete eta eskaera arrazoitzen duen dokumentazioa igo beharko da. Dokumentazioa jasotakoan, hezkuntza-taldeak elkarrizketa bat egingo du eskatzailearekin eta haren familiarekin, sarbidea baloratzeko eta, hala badagokio, laguntza-agenda pertsonalizatua ezartzeko. Prozesu horrek adingabearen interesak eta behar posibleak ezagutzeko aukera emango dio taldeari.

Gazteleku berria: zerbitzu indartua, etorkizun berria

Hondarribiko Gaztelekuak etapa berri bati ekin dio, joan den uztailaren 15ean sinatutako kontratu berriarekin. Akordioak mugarri esanguratsua ezarri du udalerriko nerabeentzako arretan. Lan-esparru berria Haur eta Nerabeei buruzko 2/2024 Legearekin bat dator, eta horrek aukera ematen du udal-eskaintzaren kalitatea sendotzeko eta zerbitzua gaur egungo gizarte- eta hezkuntza-beharretara egokitzeko.

Bultzada horri esker, Gaztelekuak aurrekontu handiagoa izango du jarduerak antolatzeko, materialen berrikuntzarako eta irteera gehiago eskaintzeko —9.000 eurotik 15.500 eurora igo da—. Horrez gain, plaza gehiago jarri dira eskuragarri eta programazio berezietarako monitore gehiago kontratatzeko aukera izango da. Proiektu berrituarekin giza taldea ere indartu da: lanaldiak zabaldu dira, arreta pertsonalizatuari eta hezkuntza-presentzia egonkorragoari lekua egiteko.

Programazioa, gainera, urteroko gazteen parte-hartze prozesuarekin berrantolatu da.  Gazteek eurek proposatzen dituzte garatu nahi dituzten jarduerak, eta zeharkako gaiak modu egonkorrean txertatzen dira: berdintasuna, iraunkortasuna, osasun mentala eta euskararen erabilera, besteak beste. Kanpoko aisialdiko jarduerak batez ere oporraldietan kontzentratuko dira, egun horiek bizikidetza eta esperientzia partekatuak indartzeko bereziki egokiak direlako.

Halaber, Gazteen Zerbitzua gazte-informaziorako eta izen-emateetarako erreferentziazko bulego gisa finkatu da. Laster, Jabier Ugarte kaleko 6. zenbakitik Jaizkibelgo Gazteriaren eraikin berrira (19) lekualdatuko da, espazioa zentralizatzeko eta irisgarritasuna hobetzeko. 

Oro har, hobekuntza horiek guztiek gazteleku berritu, inklusibo eta seguruagoa osatzen dute, Hondarribiko gazteen benetako beharretara egokitua. Eredu berria Gipuzkoako Foru Aldundiaren Gune Seguru, Babesle eta Tratu Onen jarraibideen arabera garatu da, Udaleko Gazteria Departamentuaren eta zerbitzuko hezkuntza-taldearen lankidetzaz.