Ekimenak adimen desgaitasuna duten pertsonak, herriko kirolariak eta boluntarioak elkartuko ditu beste urte batez, kirolaren bidez harremanak sortu, parte-hartzea sustatu eta inklusioa indartzeko helburuarekin. ATZEGI Elkartearekin eta Hondarribiko hainbat Kirol Erakunde erakunderekin elkarlanean antolatzen da jardunaldia.
Josu Peña Gizarte Kohesioko zinegotziaren hitzetan, “hirugarren edizio hau inklusioaren aldeko beste urrats bat da”. “Hondarribia Futbol Elkartetik sortu zen ideia, eta ATZEGIrekin batera ikusi genuen adimen desgaitasuna duten pertsonentzat halako jardunaldi bat oso positiboa izan zitekeela herrian. Gaur egun, kirol elkarte askoren lankidetzari esker egiten da posible ekimena”, azaldu du.
Aurtengo edizioan adimen desgaitasuna duten 120 pertsonak hartuko dute parte, beste horrenbeste Hondarribiko kirolarik eta 60 boluntario inguruk. Parte-hartzaileek hainbat kirol modalitate probatzeko aukera izango dute: arrauna Hondarribia Arraun Elkartearekin, surfa HS2 Elkartearekin, mendi-ibilaldia Erlaitz Mendi Elkartearekin, futbola Hondarribia Futbol Elkartearekin, pala Hondarribia Pilota Eskola eta Emeki Emakume Elkartearekin, saskibaloia, edota eskubaloia.
Kirolariei 09:30ean egingo zaie harrera, eta jarduerak 10:00etan hasiko dira. Goiza amaitutakoan, parte-hartzaile guztiek elkarrekin bazkalduko dute Ardoran.
Peñaren arabera, “ekimen honen balio nagusia pertsonak elkartzeko duen gaitasunean dago. Kirola tresna bikaina da harremanak sortzeko, aurreiritziak gainditzeko eta elkar ezagutza sustatzeko. Jardunaldi honetan denok ikasten dugu denengandik, eta hori da benetako inklusioaren oinarria”.
Hondarribia Futbol Elkarteko Javi Gonzalok nabarmendu duenez, “ideia oso polita iruditu zitzaigun hasieratik, baina ATZEGIren laguntzarik gabe ezinezkoa izango litzateke. Haien inplikazioa eta babesa eskertzekoak dira. Gure gaztetxoentzat inklusioa esperientzia positiboa izatea nahi dugu, eta orain arteko jardunaldi guztiak zoragarriak izan dira. Etorkizunean kirol gehiago gehitzen jarraitzea da gure nahia”.
Bestalde, Bidasoako ATZEGIko Familia Batzordeko kide Karmele Mitxelenak eskerrak eman dizkie ekimena posible egiten duten guztiei: “Ama eta ATZEGIko kide gisa, eskerrak eman nahi dizkiet ‘Hondarribia Baltsan’ babesten duten elkarte eta bultzatzaile guztiei. Herritarrak parte hartzera eta jardunaldiaz gozatzera animatu nahi ditugu”.
Amaitzeko, Josu Peñak ere jardunaldia posible egiten duten elkarte, boluntario eta kirol eragile guztiak eskertu nahi izan ditu: “Hondarribia Baltsan bezalako ekimenak ez lirateke posible izango herriko ehun sozialaren eta kirol elkarteen inplikaziorik gabe. Elkarlan horrek erakusten du Hondarribia herri solidarioa, irekia eta aniztasuna aberastasun gisa ulertzen duen komunitatea dela. Denon artean Hondarribia inklusiboagoa egiten dugu, eta herritarrak animatu nahi ditugu igandean bertaratzera eta jardunaldia gertutik ezagutzera”.