Gobernu Taldeak Udal Batzordera eraman du gaur Hiri Antolamenduko Plan Orokorraren hasierako onarpenerako dokumentua entregatu eta aurkeztea. Hala jakinarazi du batzorde horretako lehendakari Maria Serranok. “Gobernu Taldearen asmoa da gainerako alderdiekin batera lantzea, eta apirileko ohiko osoko bilkurara eramatea dokumentu horren hasierako onarpena, gero administrazio publiko eskudunei jakinarazteko eta jendaurrean jartzeko”.

“2022ko abuztuaren 26an Osoko Bilkurak HAPOren helburuak eta irizpideak onartu zituen, eta ordutik dokumentua idazteko lanean ari gara. Bereiki eskertu nahi diet Udaleko Arkitektoari eta bere lantalde teknikoari egiten ari diren lanagatik, gaur, martxoak 31, Hondarribiko Hiri Antolamenduko Plan Orokorraren hasierako onarpenerako dokumentua entregatu eta aurkeztu ahal izan dezagun. Azalpen tekniko guztiak eman dira eta Gobernu Taldearen asmoa da datozen asteetan lanean jarraitzea, eta apirileko ohiko osoko bilkurara eramatea.

Landu den dokumentua oso luzea da, eta bertan datozen urteetan hiriaren garapena definituko duten elementu asko zehazten dira. Baina badira nabarmendu nahiko genituzkeen hainbat elementu: etxebizitza, jarduera ekonomikorako espazioak eta Mendelu auzoaren antolamendua.

1652 etxebizitza

Planaren garapenari esker, 1.652 etxebizitza eraiki ahal izango dira, gehienak publikoak, eta, horrela, etxebizitza publikoaren eskaerari erantzungo zaio.

Jarduera ekonomikorako eremu berriei dagokienez, Zubietaren garapena nabarmendu nahiko genuke, Campus Teknologiko berria ezartzeko, Gipuzkoako Foru Aldundiarekin eta Parke Teknologikoarekin lankidetzan.

Planak Mendelu-Eskapatxulorako antolamendu bat ere jasotzen du, plangintza berezi bat garatzea proposatuz, HAPOren izapidetzearekin paraleloa izan daitekeena, Mendeluko lan-mahaian jakinarazi zen bezala.

Dokumentuaren hasierako onarpena egin ondoren, kasuan kasuko administrazio publikoei helaraziko zaie, aldeko txostena eman dezaten. Era berean, eta legeak agintzen duen bezala, dokumentua jendaurrean azalduko dugu. Azalpen-prozesu horri buruzko informazio zehatza aurrerago emango dugu, herritarrek, orduan, egokitzat jotzen dituzten alegazioak egiteko aukera izango baitute.

Alegazio horiek ebatzi ondoren, HAPOn sartuko dira, Eusko Jaurlaritzako organo eskudunak idatzitako ingurumen-memoriarekin batera. Orduan behin-behinean onartuko den dokumentua Euskal Herriko Lurralde Antolamendurako Batzordera eramango da, eta sortutako dokumentazio guztiari oniritzia eman ondoren, HAPO onartu beharko da Hondarribiko Udalaren Osoko Bilkuran, eta ondoren Gipuzkoako Aldizkari Ofizialean argitaratu” amaitu du Maria Serrano zinegotziak.