Gaur, irailak 27, Hondarribiko Udaleko Bizikidetza Batzordeak herritarrei jakinarazi nahi die 2024-2025 ikasturtean zehar Memoria Demokratikoa berreskuratzeko jarduerak egingo direla.
Memoria Demokratikoari dagokion urriaren 19ko 20/2022 Legea kontuan hartuta, Estatu Kolpetik, gerra eta 40 urteko diktadura garaian Hondarribian gertatutakoari buruzko ezagutza sustatzen jarraitu nahi du Udalak, giza eskubideen urraketa eta jasandako bidegabekeriak salatuz eta bizi izandako penak aitortuz.
Urrian omenaldia egingo zaie 1936-1939 aldian errepresaliatutako alkate, zinegotzi eta udal langileei.
1936ko Estatu Kolpearen ondoren, gerra eta diktadura urteak iritsi ziren, eta Hondarribiko Udaleko hainbat alkate, zinegotzi eta langile beren erantzukizun eta eginkizunetatik kendu zituzten.
Hori dela eta, Hondarribiko Udalak, alderdi politiko guztien babesarekin, omenaldia antolatu du urriaren 26an, eguerdiko 12:00etan, Itsas etxea auditoriumean, pertsona horien guztien duintasuna berrezartzeko. Ekitaldi horretara omendutako pertsonen senideak gonbidatuta egongo dira, eta erreparazio-aktak emango zaizkie senideei.
Honako pertsona hauek omenduko dituzte:
- Alkateak: Manuel Canoura Hernandorena eta Ramón Pérez Pérez.
- Zinegotziak: Floro Izaguirre Aguirrezabal; Juan Garmendia Iriazabal; Enrique Berrotaran Sagarzazu; Angel Urrutia Zuzuarregui; Pedro Alcain Berrotaran; Anselmo Salaverria Picavea; Pedro García Ortiz; Juan Telleria Larrea; eta Juan Jose Petit Ory.
- Udal-langileak: Angel Telleria Zumalakarregi, Jose Miguel Echaniz Arruti; Arturo Hernández San Martin; Candido Ostolaza Garate; Antonio Bernedo Fernández; Luis Telleria Larrea; Alberto Lasa Badiola; Jesus Zubeldia Garaño; Martin Goicoechea Loidi; Francisco Sagrado Zubiaga; Antonio Tobalina Pérez; Juan Tolosa Catarain; Jesus Sagrado Azurmendi; Ramon Campandegui Sagarzazu; Francisco Lapitz Campandegui eta Cayo Lasa Zala.
Prentsaurreko hau aprobetxatuz, oraindik jakinarazi ezin izan diegun familiei Udalarekin harremanetan jar daitezela eskertuko genieke. Urratsak eman dira familia guztiak gonbidatzeko, baina zaila da, igarotako denboragatik. Informatzeko deitu 685 72 00 32 telefonora edo bakeola@edefundazioa.org helbidera.
Fermin Olaskoagari eskerrak eman nahi dizkiogu gure hiriko familien inguruan egindako lan eskerga eta eskuzabalagatik. Ekarpen horiek egin ezean, nekez burutu ahal izango genuke era honetako aitortzarik.
Era berean, Joxerra Enparan, Aitzol Arroyo, Pedro Barruso eta Koldo Ortega historialariei eskertu nahi diegu Hondarribiako Memoriaren inguruan eskaintzen duten aholkularitza, ezagutza eta burutzen duten lan handia ere.