Igande honetan burutuko den Udal eta Foru hauteskundeetan Hondarribiko adin nagusiko 13.501 pertsonek izango dute bozkatzeko eskubidea. 5 hautesleku, 12 atal, eta 21 hautes-mahaietan banaturik, hondarribiarrek aukera bost hautagairen artean egin beharko dute.

Hautagaiak Gonzalo Carrion (EAJ), Igor Emparan (ABOTSANITZ), Noemi Odriozola (PSE-EE), Garoa Lekuona (EH BILDU) eta Javier Cristobal (PP) dira.

Hautesleku bakoitzari dagokionez, Jostaldi Pilotalekuan 6.135 hondarribiarrek izango dute botoa emateko aukera, botu-emaile guztien %45’44 izango direlarik. Itsas Etxean aldiz 3.050 izango dira, hondarribiarren %22’59. Kopuru aldetik, hirugarren hauteslekua Mendelukoa izango da 1901 herritarrekin, hondarribiarren %14’08, beste 1260ek Amuten bozkatzeko aukera izango dute (%9’33), eta 1155ek Udaletxean, Alde Zaharrean, hondarribiarren %8’55 hain zuzen ere.

Igandean bertan Hondarribiko Udalak bere sare sozialen bidez udal hauteskundeen emaitzen berri emango du.